కామాంధులతో పోరాడి గెలిచిన 19 ఏళ్ల బాలిక

న్యూఢిల్లీ: అత్యాచారం చేయడానికి యత్నించిన కొంతమంది దుండగులతో ధైర్యంగా పోరాడి గెలిచిందో బాలిక. దక్షిణ ఢిల్లీలోని ఫతేపూర్ బేరీ ప్రాంతంలో నీళ్లు పట్టుకునే క్రమంలో బావి దగ్గరకు వెళ్లిన ఓ బాలిక (19)పై ముగ్గురు వ్యక్తులు అత్యాచారం చేయబోయారు. ఆ క్రమంలోనే ఆ బాలిక ను బలవంతంగా అపహరించి దగ్గర్లోని అడవిలోకి తీసుకువెళ్లారు. అక్కడ ఆ ముగ్గురు కలిసి సామూహిక అత్యాచారం చేయడానికి యత్నించారు. కాగా ఆ యువతి వారిని ధైర్యంగా ప్రతిఘటించి అక్కడి నుంచి తప్పించుకుని ఇంటికి చేరింది. ఈ ఘటనపై తల్లి దండ్రులకు తెలపడంతో వారు పోలీస్ స్టేష్టన్ లో ఫిర్యాదు చేశారు. 
 
ఆ బాలిక గత రాత్రి 8 గం.లకు  నీళ్లు తెచ్చుకునేందుకు వెళ్లిన సమయంలో ఈ ఘటన చోటు చేసుకున్నట్లు పోలీస్ అధికారి తెలిపారు. దీనిపై కేసు నమోదు చేసుకుని దర్యాప్తు చేపట్టామని, త్వరలోనే నిందితులను పట్టుకుంటామన్నారు. ఈ ఘటనలో తలకు గాయాలైన ఆ యువతికి ఎయిమ్స్ ఆస్పత్రిలో చికిత్స అందిస్తున్నారు.