'ఆగడు' నుంచి కావాలనే తప్పించారు: ప్రకాశ్ రాజ్

మహేష్ బాబు- శ్రీను వైట్ల కాంబినేషన్ లో రూపొందుతున్న 'ఆగడు' చిత్రం నుంచి తనను ఉద్దేశపూర్వకంగానే తప్పించారని విలక్షణ నటుడు ప్రకాశ్ రాజ్ ఆరోపించారు. ఇదంతా ఒక్కడే చేస్తున్నాడని, దీనిపై తాను త్వరలోనే మూవీ ఆర్టిస్ట్ అసోసియేషన్‌లో ఫిర్యాదు చేస్తానని ఆయన అన్నారు. అంతేకాదు.. ఆ ఒక్కరి పేరు కూడా త్వరలో బయటపెడతానని ప్రకాశ్‌రాజ్‌ చెప్పారు.

ఆ సినిమాకు సంబంధించిన హీరోతో గానీ, నిర్మాతతో గానీ, అసిస్టెంట్ డైరెక్టర్లతో గానీ తనకు ఏమాత్రం గొడవల్లేవని స్పష్టం చేశారు. దర్శకత్వశాఖలో ఒకరితో ప్రకాశ్ రాజ్ కు గొడవ అయ్యిందని, దానిపై ఫిర్యాదులు వెళ్లడంతో ఆయనను తప్పించి, ఆ స్థానంలో సోనూసూద్ ను తీసుకున్నారని సమాచారం. ఇంతకుముందు కూడా ఒకసారి ప్రకాశ్ రాజ్ ను టాలీవుడ్ సినిమాల నుంచి కొన్నాళ్ల పాటు బహిష్కరించి తర్వాత మళ్లీ తీసుకున్నారు.