సినిమాల్లో ఓకే - నెట్

హీరోయిన్  శృతిహాసన్ ఈ మధ్య ఏదో ఒక విషయమై వివాదాలలో చిక్కుకుంటోంది. అందాలను ఆరబోయడంలో శృతి మించుతున్నారని, గ్లామర్ విషయంలో హద్దులు మీరుతున్నారని ఆమెపై విమర్శలు కూడా  వస్తున్నాయి. ఈ భామ బాలీవుడ్ లో ప్రవేశించడం ప్రవేశించడమే తొలి చిత్రం లక్ (హిందీ)లో బికినీ అందాలతో యువతను ఉక్కిరిబిక్కిరి చేసింది.  ఆ తరువాత 'డిడే' హిందీ చిత్రంలో వేశ్య పాత్రలో హద్దులుమీరి శంగారాన్ని ఒలకబోసింది.  ఇక తెలుగు చిత్రం రేసుగుర్రంలో అయితే  ఒక పాటలో  హాట్ హాట్ డ్యాన్స్ తో  కుర్రకారుకు గుబులు పుట్టించ్చింది. ఆ ఫోటోలతో కూడిన పోస్టర్ల వల్ల చెన్నైలో కొన్ని చోట్ల ట్రాఫిక్ జామ్ అయింది.   దాంతో  మహిళా సంఘాల వారు ఆందోళనకు దిగారు.  గ్లామర్‌కు కూడా ఒక హద్దు ఉంటుందని వారు కొన్ని చోట్ల ఆ వాల్ పోస్టర్లను చింపేశారు.

ఒక్కో చిత్రంలో ఒక్కో రకంగా తన అందాలను ఆరబోస్తున్న ఈ ముద్దుగుమ్మ  తన అశ్లీల ఫోటోలను ఇంటర్నెట్‌లో ప్రచారం చేశారంటూ ఆగ్రహం వ్యక్తం చేస్తున్నారు. సినిమాలలో  అశ్లీలంగా నటించడానికి అభ్యంతరం తెలపని శృతిహాసన్, ఇప్పుడు తన ఫొటోలను ఇంటర్నెట్ లో పెట్టినవారిపై కేసు వేస్తానని హెచ్చరిస్తున్నారు. ఈ భామ తెలుగులో ఇంతకు ముందు రామ్ చరణ్ సరసన ఎవడు చిత్రంలో నటించారు. ఈ చిత్రంలోని ఆమె గ్లామరస్ ఫోటోలు ఇంటర్నెట్‌లో హల్‌చల్ చేస్తున్నాయి. దీనికి కారణం ఆ చిత్ర నిర్మాతగానీ, స్టిల్ ఫోటో గ్రాఫర్‌గానీ అయి ఉంటారని ఆమె అనుమానిస్తున్నట్లు సమాచారం.  ఇటువంటి చిత్రాలను ప్రచురించే ముందు తన అనుమతి తీసుకోవాలన్నది ఆమె అభిప్రాయం.