సింగిల్ ఇంజినా.. అయితే నేనెక్కను!

హైదరాబాద్: కొద్దిరోజులుగా హెలికాప్టర్‌లో తిరుగుతూ తెలంగాణ ప్రాంతంలో బీజేపీ అభ్యర్థులకు అనుకూలంగా ప్రచారం చేస్తున్న జనసేన అధినేత పవన్‌కల్యాణ్.. శనివారం మాత్రం హెలికాప్టర్ ఎక్కడానికి నిరాకరించారు. అవసరమైతే రోడ్డు మార్గాన వెళ్తాను కానీ, అందులో మాత్రం ప్రయాణించేది లేదని స్పష్టంచేశారు. పైలట్ ధైర్యం చెప్పినా సరే.. వినకుండా చివరకు కారులో ప్రచారానికి వెళ్లిపోయారు. ఎన్నికల ప్రచారం కోసం ప్రస్తుతం బీజేపీ రెండు హెలికాప్టర్లను ఉపయోగిస్తోంది. వీటిలో ఒకదాన్ని పవన్ కల్యాణ్‌కు కేటాయించింది. శనివారం ఉదయం కరీంనగర్ జిల్లా గోదావరిఖని, రామగుండం నియోజకవర్గాల్లో ఆయన ప్రచారానికి వె ళ్లాల్సి ఉంది. దీంతో ఉదయమే పవన్ బేగంపేట విమానాశ్రయానికి చేరుకున్నారు. అక్కడ తనకోసం కేటాయించిన హెలికాప్టర్‌లో సాంకేతిక లోపం తలెత్తిందని, మరో హెలికాప్టర్‌లో ఎక్కాలని సిబ్బంది సూచించారు.

అది సింగిల్ ఇంజిన్ హెలికాప్టర్ అని తెలియడంతో, అందులో ఎక్కబోనని పవన్ స్పష్టంచేశారు. ఒకే ఇంజిన్ ఉన్నా ఎలాంటి ఇబ్బంది ఉండదని, అకస్మాత్తుగా ఇంజిన్ మొరాయించే పరిస్థితి తలెత్తదని, అది పూర్తి కండిషన్‌లో ఉన్న హెలికాప్టరేనని పైలట్ ధైర్యం చెప్పినా ఆయన వినిపించుకోలేదు. డబుల్ ఇంజిన్‌దైతేనే ఎక్కుతానని భీష్మించారు. అది మరమ్మతు కావడానికి సమయం పడుతుందని చెప్పడంతో ఆయన కారులోనే ప్రచారానికి వెళ్లిపోయారు. అయితే, ముందుగా అనుకున్న సమయానికి రోడ్డుమార్గంలో గోదావరిఖని చేరుకునే అవకాశం లేకపోవడంతో ఫోన్ ద్వారా తన సందేశాన్ని వినిపించి ఆ సభలు రద్దు చేసుకున్నారు.