ప్రేమ పేరుతో వంచన

మల్లయ్యపల్లిలో బైఠాయించిన దివ్య, పెళ్లి ఆధారాలు చూపిస్తున్న స్వరూప

ముప్పిరితోట(ఎలిగేడు) : పెళ్లై భర్త, కుమారుడు ఉన్న ఓ మహిళను ప్రేమ పేరుతో నమ్మించి మోసం చేశాడో ప్రబుద్ధుడు. ముప్పిరితోట పరిధి మల్లయ్యపల్లికి చెందిన పూరెల్ల దివ్యకు మేనబావతో పదేళ్ల క్రితం వివాహమైంది. వీరికి ఓ కుమారుడు కూడా జన్మించాడు. దివ్య తరుచూ మప్పిరితోటలోని పుట్టింటికి వచ్చిపోతున్న క్రమంలో అనుబంధ గ్రామమైన మల్లయ్యపల్లికి చెందిన ఆటోడ్రైవర్ జాతరగొండ మహిపాల్‌తో పరిచయం ఏర్పడింది. అది ప్రేమగా మారింది. ఈ క్రమంలో మహిపాల్ ఆమెను పెళ్లి చేసుకుంటానని చెప్పి భర్తకు విడాకులిప్పించాడు. అనంతరం ఇరువురు పెద్దల సమక్షంలో పెళ్లి చేసుకున్నారు. ఏడాది తర్వాత దివ్యను కట్నం కోసం శారీరకంగా, మానసికంగా ఇబ్బందులకు గురిచేయడంతో బాధితురాలు జూలపల్లి పోలీసులను ఆశ్రయించింది. అయినా ఫలితం లేకపోవడంతో మహిళా సంఘాల సహకారంతో శనివారం మహిపాల్ ఇంటిఎదుట ఆందోళన చేపట్టింది. తనకు న్యాయం జరిగేంత వరకూ పోరాటం చేస్తానంది. లేదంటే ఆత్మహత్యే శరణ్యమంటూ ఆవేదన వ్యక్తం చేస్తోంది.
 
 ప్రేమించి పెళ్లికి నిరాకరించాడని....
సారంగాపూర్ : నాలుగేళ్లుగా ప్రేమించానని మాయమాటలు చెప్పి నమ్మించిన ప్రబుద్ధుడు తీరా పెళ్లికి నిరాకరించడంతో ఆత్మహత్యాయత్నానికి పాల్పడిందో యువతి. కోనాపూర్‌కు గ్రామానికి చెందిన గంగధరి నవీన్‌కుమార్ వరంగల్ జిల్లా ఎనిమాలకు చెందిన చేల స్వరూప రెండున్నరేళ్లుగా ప్రేమించుకుంటున్నారు. నవీన్‌కుమార్ డిగ్రీ పూర్తి చేసి హైదరాబాద్‌లోని ఓ ప్రైవేటు కంపెనీలో ఉద్యోగం చేస్తున్నాడు. అక్కడే స్వరూప ఓ ప్రైవేటు ఆస్పత్రిలో నర్స్‌గా పనిచేస్తుంది. 2011 డిసెంబర్‌లో ఏర్పడిన వీరి పరిచయం ప్రేమగా మారింది.
 
 కాగా, నవీన్‌కుమార్ ఆరు నెలలుగా మొహం చాటేశాడు. స్వరూపను పట్టించుకోవడం ఏలదు. నెల క్రితం ఆతడి తల్లితండ్రులు వివాహం చేసేందుకు అతడికి నిశ్చితార్థం కూడా పూర్తి చేశారు. విషయం తెలుసుకున్న స్వరూప ఫోన్‌లో అతడిని నిలదీయగా కులాలు వేరైనందున ఇంట్లో పెద్దలు పెళ్లికి అంగీకరించడం లేదని పేర్కొన్నాడు. దీంతో ఆమె తన బంధువులను పది రోజుల క్రితం సారంగాపూర్ పోలీస్‌స్టేషన్‌కు వచ్చి సమస్య వివరించగా వారు ఎన్నికల నేపథ్యంలో 12వ తేదీన రావాలని సూచించారు. ఇద్దరిని స్థానిక ఎస్సై నరేశ్‌రెడ్డి విచారించి కౌన్సెలింగ్ చేశారు. ప్రత్యేకంగా మాట్లాడుకోవాలని సూచించారు. ఈ క్రమంలో తీవ్ర ఆగ్రహానికి లోనైన స్వరూప నవీన్‌కుమార్‌పై చేయిచేసుకుంది. వెంటనే నిద్రమాత్రలు మింగింది. విషయాన్ని గమనించిన అక్కడివారు పోలీసులకు సమాచారం ఇవ్వగా ఎస్సై ఆమెను జగిత్యాల ఏరియా ఆస్పత్రికి తరలించారు.