మోడీ భార్య అక్రమ నిర్బంధం!

న్యూఢిల్లీ: బీజేపీ ప్రధాని అభ్యర్థి నరేంద్రమోడీ భార్య యశోదాబెన్‌ను గుర్తుతెలియని ప్రదేశంలో అక్రమంగా నిర్బంధించారనే తీవ్ర ఆందోళనతో కూడిన అనుమానాలు వ్యక్తమవుతున్నాయని, ఆమె ప్రాణాలకు ముప్పు పొంచివుందని, ఆమె అసలు జీవించి ఉందో లేదో దర్యాప్తు జరిపించాలని కోరుతూ మీరట్‌కు చెందిన హరిశంకర్ అనే న్యాయవాది భారత ప్రధాన న్యాయమూర్తి, ఢిల్లీ హైకోర్టు ప్రధాన న్యాయమూర్తిలకు లేఖ రాశారు. శంకర్ రాసిన లేఖ ఈ నెల 25వ తేదీన తమకు అందిందని ఢిల్లీ హైకోర్టు వర్గాలు ధృవీకరించాయి.‘‘కొన్ని సంఘ వ్యతిరేక శక్తులు గుజరాత్‌కు చెందిన ఉన్నతస్థాయి భద్రతా సిబ్బందితో కుమ్మక్కై యశోదాబెన్‌ను అపహరించి, గుర్తుతెలియని ప్రదేశంలో అక్రమంగా నిర్బంధించినట్లు కనిపిస్తోంది.

ఆమె ప్రాణాలు ప్రమాదంలో ఉన్నాయి. యశోదాబెన్ ప్రాణం, స్వేచ్ఛ, భద్రత, రక్షణ అంశాలపై తక్షణం జోక్యం చేసుకోవాల్సిందిగా విజ్ఞప్తి చేస్తున్నాం’’ అని భారత ప్రధాన న్యాయమూర్తి జస్టిస్ ఆర్.ఎం.లోధా, ఢిల్లీ హైకోర్టు ప్రధాన న్యాయమూర్తి జస్టిస్ జి.రోహిణిలకు రాసిన లేఖలో శంకర్ కోరారు. యశోదాబెన్‌ను నరేంద్రమోడీ వివాహమాడారని తొలిసారిగా బయటకు తెలిసిందని ఆయన తన లేఖలో పేర్కొన్నారు. ‘‘ఆమె గుజ రాత్‌లోని రాజోస్నా గ్రామంలో ఉండగా కొన్ని చానళ్లు చూపించాయి. ఆమె ఇంటర్వ్యూను కూడా రికార్డు చేశాయి. కానీ అకస్మాత్తుగా ఆమె అదృశ్యమయ్యారు. ఆమె ఎక్కడ ఉన్నారు, ఎలా ఉన్నారు అనే విషయాలు చాలా రోజులుగా తెలియటం లేదు’’ అని పేర్కొన్నారు.

 మోడీ గత కొద్ది రోజుల వరకూ తన వైవాహిక స్థితిపై మౌనంగా ఉన్న విషయం తెలిసిందే. ఇటీవల వదోదర లోక్‌సభ నియోజకవర్గంలో పోటీ చేయటానికి నామినేషన్లు సమర్పిస్తూ తన అఫిడవిట్‌లో తాను వివాహితుడినని, తన భార్య పేరు యశోదాబెన్ అని వెల్లడించిన విషయం విదితమే.