సమైక్యాంధ్రప్రదేశ్‌లో 17 రోజుల సీఎం ఎవరు..?

సమైక్యాంధ్ర జూన్‌ 2 వ తేదీన ఆంధ్రప్రదేశ్‌, తెలంగాణ రాష్ట్రాలుగా విడిపోనుంది. అయితే ప్రస్తుతం జరుగుతున్న ఎన్నికలు సమైక్యాంధ్రలో చివరి సాధారణ ఎన్నికలు. మే 16వ తేదీన ఓట్ల లెక్కింపు జరుగుతుంది. అయితే విజేతలందరూ జూన్‌ 2వ తేదీలోగా ఒక్కసారైనా సమావేశం కావాల్సి ఉంది. వీరు తప్పనిసరగా తమ శాసనసభాపక్ష నేతను ఎన్నుకోవాల్సి ఉంటుంది. వీరిలో మెజార్టీ స్థానాలు వచ్చిన పార్టీ నాయకుడు ముఖ్యమంత్రిగా ప్రమాణ స్వీకారం చేయకతప్పనిసరి పరిస్థితి.

 

ఓట్ల లెక్కింపు అనంతరం సమైక్యాంధ్రప్రదేశ్‌లో గవర్నర్‌ మెజార్టీ స్థానాలు సాధించిన నాయకుడిని ప్రభుత్వ ఏర్పాటుకు ఆహ్వానించాల్సి ఉంది. ఇలా అయితే టీఆర్‌ఎస్‌కు ఆ అవకాశం ఉండదు. ఎందుకంటే టీఆర్‌ఎస్‌ కేవలం తెలంగాణకే పరిమితమవుతుంది. ఇక కాంగ్రెస్‌కు సీమాంధ్రలో జీరో లేదా ఒకటి రెండు స్థానాలు మాత్రమే వస్తాయి. ఈ పరిస్థితుల్లో ఇటు సీమాంధ్ర, అటు తెలంగాణలో భాజపా-తేదేపా కూటమికే ఎక్కువ సీట్లు వచ్చే అవకాశం ఉంది. ఇక సమైక్యాంధ్ర ప్రదేశ్‌లో చివరి ప్రభుత్వాన్ని తేదేపాయే ఏర్పాటు చేయాలి. చంద్రబాబు నాయుడే సమైక్యాంధ్రకు చివరి ముఖ్యమంత్రి అవుతారు.

 

ఒకవేళ సీమాంధ్రలో వైకాపాకు ఎక్కువ సీట్లు వస్తే తెరాసతో కలుపుకుని వీరిద్దరు ప్రభుత్వాన్ని ఏర్పాటు చేసే అవకాశం ఉంది. అలాగైతే ఈ రెండు పార్టీలకు చెందిన నేతల్లో కేసీఆర్‌, జగన్‌ ఇద్దరి మధ్య మంచి అవగాహన ఉంది. అయితే ఇద్దరిలో ఎవరు ఈ పదిహేడు రోజులపాటు సమైక్యాంధ్రకు చివరి ముఖ్యమంత్రి అవుతారో చెప్పడం కష్టం. వైకాపాకు ఎక్కువ సీట్లు వస్తే టీఆర్‌ఎస్‌ నేతలు పెద్ద ఇబ్బంది పెట్టకపోవచ్చని విశ్లేషకులు అంటున్నారు.

 

చివరగా సీమాంధ్రలో ఎక్కువ సీట్లు వచ్చిన వారే సమైక్యాంధ్రప్రదేశ్‌కు చివరి ముఖ్యమంత్రి అవుతారనడంలో ఎటువంటి సందేహాలు కనపడడం లేదు. ఒకవేళ ఎటుతిరిగి తెలంగాణలో కాంగ్రెస్‌కు సీమాంధ్రలో మరోపార్టీకి ఎక్కువ సీట్లు వస్తే మాత్రం ఎవరు ప్రభుత్వం ఏర్పాటు చేస్తారనేదే సందేహంగా ఉంది. ఈ తలనొప్పులన్ని వస్తాయనే తెరాస నాయకులు ముందుగానే ఢిల్లీకి వెళ్లి అపాయింట్‌డేను మే 17కు మార్చాలని కోరారు. అయితే వీరి విన్నపాన్ని కేంద్ర ప్రభుత్వం తోసిపుచ్చింది. రాష్ట్ర విభజన ఇంకా పూర్తికానందున ఎట్టి పరిస్థితుల్లోను అపాయింట్‌డేను ముందుకు మార్చేది లేదని తేల్చిచెప్పింది. దీంతో సమైక్యాంధ్రప్రదేశ్‌లో కొద్ది రోజుల పాటు స్వల్ప కాలం ప్రభుత్వాన్ని ఎవరో ఒకరు ఏర్పాటు చేయకతప్పదు. అయితే ఇది ఎవరనేది ప్రశ్నార్థకంగా ఉంది. ఈ ఉత్కంఠకు ఫలితాలు వచ్చాకే తెరపడనుంది.