జనసేన విధానమేంటంటే...

                  తాత్కాలిక రాజకీయ ప్రయోజనాల కోసం పాకులాడే ఫక్తు రాజకీయ పార్టీ కాదు జనసేన.. సుదీర్ఘ లక్ష్యాల సాధన కోసం జనసేన ఆవిర్భవించింది..’ అంటూ పార్టీ విధానాల్ని జనసేన పార్టీ వెల్లడించింది. స్వాతంత్ర దినోత్సవం, గణతంత్ర దినోత్సవాలతోపాటుగా తెలంగాణ, ఆంధ్రప్రదేశ్‌ రాష్ట్రాల ఆవిర్భావ దినోత్సవాలనూ సెలవు దినాలుగా పాటించాలని జనసేన నిర్ణయించింది. జయంతులు వర్దంతులు తదితరాలు కేవలం రాజకీయ పరమైన ఉద్దేశ్యాలతో సెలవు దినాలుగా పాటించబడ్తున్నాయని జనసేన పార్టీ అభిప్రాయపడింది. మీడియాకి విడుదల చేసిన ప్రకటనలో, పార్టీ విధానాల్ని వెల్లడించిన జనసేన పార్టీ, రాజకీయాల్లో కొత్త రక్తం నింపేలా తమ పార్టీ వుంటుందని స్పష్టం చేసింది. సమాజంలో విప్లవాత్మక మార్పులు పునాది స్థాయి నుంచీ తీసుకొచ్చేదిశగా తమ పార్టీ కృషి చేయనుందని జనసేన చెబుతోంది. సభ్యత్వ నమోదు ప్రక్రియ ఇప్పటికే ప్రారంభించినట్లు ప్రకటనలో పేర్కొంది జనసేన పార్టీ. పెద్ద సంఖ్యలో పవన్‌ అభిమానులు సభ్యత్వం తీసుకుంటున్నారనీ, యువత పెద్దయెత్తున తమ పార్టీలో చేరేందుకు ఉత్సాహం ప్రదర్శిస్తోందనీ, ఇది శుభ పరిణామమని జనసేన పార్టీ తరఫున మీడియాకి అందిన ‘నోట్‌’లో ప్రస్తావించారు. సినీ నటుడు పవన్‌కళ్యాణ్‌ స్థాపించిన జనసేన పార్టీ తరఫున ఎవరు మీడియాకి ప్రకటనలు విడుదల చేస్తున్నారో ఎవరికీ అర్థం కాని పరిస్థితి నెలకొంది. ప్రకటనల సంగతి తర్వాత, ముందు పార్టీకి చెందిన వ్యక్తులమంటూ ఎవరో ఒకరు మీడియా ముందుకొస్తే బావుంటుందన్నది పవన్‌కళ్యాణ్‌ అభిమానుల వాదన. మరి, పార్టీ పెట్టాం.. పనైపోయిందన్నట్లు వ్యవహరిస్తున్నారన్న విమర్శలకు పవన్‌కళ్యాణ్‌ ఎప్పుడు సమాధానమిస్తాడో ఏమో మరి.! -