ఎన్టీఆర్‌కి ఛాన్సుందా?

జ‌న‌సేన - టీడీపీ పొత్తు దాదాపు ఖాయ‌మైన‌ట్టే. ప‌వ‌న్ క‌ల్యాణ్ స‌పోర్ట్‌తో తెదేపా మ‌రింత రెచ్చిపోయే అవ‌కాశాలున్నాయి. తేదేపా త‌న ప్రచారంలో ప‌వ‌న్‌ని ప్రధాన అస్త్రంగా వాడుకొంటుంద‌న్నది నిర్వివాదాంశం. అయితే ఇప్పటికే తేదేపాలో ఓ ట్రంప్ కార్డ్ ఉంది. అదే... ఎన్టీఆర్‌. ప‌వ‌న్ ఎంట్రీ ఇస్తే ఎన్టీఆర్ ప‌రిస్థితి ఏమిట‌న్నది కీల‌క‌ ప్రశ్నగా మారింది. గ‌త ఎన్నిక‌ల్లో ఎన్టీఆర్ తెదేపా త‌ర‌పున విస్ర్కృతంగా ప్రచారం చేశాడు. ఈసారీ తెలుగుదేశం కండువాను భుజంపై వేసుకొంటాడ‌న్నది గ్యారెంటీ. అయితే ఇటు ప‌వ‌న్ - అటు ఎన్టీఆర్‌... వీరిద్దరిలో బాబు ఎవ‌రిని వాడుకొంటార‌న్నది భ‌విష్యత్తు నిర్ణయించాలి.

జూనియ‌ర్‌కి చెక్ పెట్టడానికి తెదేపాకి ఇదే అవ‌కాశం.. అన్నవాళ్లూ లేక‌పోలేదు. గ‌త ఎన్నిక‌లలో జూనియ‌ర్ ప్రచారం చేసిన మాట వాస్తవ‌మే. అత‌ను వెళ్లిన చోటల్లా భారీగా జ‌నం వ‌చ్చారు. అయితే.. ఎన్టీఆర్ ప్రచారానికి వెళ్లిన ప్రతీచోటా తెదేపా ఓడిపోయింది. ఆ త‌ర‌వాత‌.. పార్టీ వ్యవ‌హారాల‌కు అంటీముట్టన‌ట్టుగానే ఉండిపోయాడు జూనియ‌ర్‌.  బాబాయ్‌తో గొడ‌వ‌లు.. టీడీపీ నా సొంత ఆస్తి అన్నట్టు వ్యవ‌హ‌రించ‌డం ఎన్టీఆర్‌కి ప్రతిబంద‌కాలుగా మారాయి. 

ఇప్పుడు కాక‌పోయినా ఎపుడో ఒక‌ప్పుడు ఎన్టీఆర్ వ‌ల్ల త‌న‌కు ప్రమాదం త‌ప్పద‌ని భావించిన బాబు... మ‌ధ్యలో లోకేష్ ని రంగంలోకి తెచ్చి జూనియ‌ర్‌కి చెక్ పెట్టాడు బాబు. అది కొంత మేర విజ‌య‌వంత‌మైంది. ఇప్పుడు ప‌వ‌న్ రాక‌తో టీడీపీలో ఎన్టీఆర్ ప్రాబ‌ల్యం పూర్తిగా త‌గ్గే అవ‌కాశాలు క‌నిపిస్తున్నాయి. ఎన్టీఆర్ - ప‌వ‌న్‌.. ఇద్దరినీ వాడుకొంటే... సినీ గ్లామ‌ర్‌కు కొద‌వ ఉండ‌ద‌ని భావిస్తే.. ఎన్టీఆర్‌ని బాబు వ‌దులుకోక‌పోవ‌చ్చు. మొత్తానికి ప‌వ‌న్ రాక‌తో.. తెదేపాలో ఎన్టీఆర్ స్పీడు త‌గ్గే అవ‌కాశాలు స్ప‌ష్టంగా క‌నిపిస్తున్నాయి.